Thursday, April 25, 2013

呷一口京都的味道:無須雪糕機 - 自家制宇治金時 (抹茶雪糕) 附食譜

京都的宇治茶相當有名,每逢去京都,我也很愛吃它的抹茶雪糕,口味之清新,與別不同,尤其可以咀嚼出抹茶中的甘香,好像有著歷史中的風韻

京都有很多甜品店,都以抹茶為熱賣,抹茶雪糕和抹茶新地非常流行,大大個抺茶雪糕球配以紅豆、年糕和抺茶沙冰,賣相一流,難怪成為京都的必食甜點

其實,只要花一花心思,在家也可以弄一杯抹茶雪糕,加點紅豆,就變成了京都出名的宇治金時。
宇治金時這名字很動聽,「宇治」指宇治綠茶,「金時」原指名為「金時豆」的紅豆,後來演變為指以砂糖煮調過的紅豆。兩者我也很喜歡,配在一起,味道很夾,甘香與微甜,變了一個很吸引的甜品。


材料:
淡忌廉................................250ml
北海道牛奶.........................250ml
糖.........................................120g
 *(喜歡少甜的我,今次也要用120g糖,因為抹茶粉味甘,不夠糖的話,雪糕會帶苦,所以120g糖甜度才剛剛好) 
抹茶粉.................................5湯匙



材料和之前一樣,也是很簡單


烘培店可以購買到的抹茶粉,謝謝好友相贈 ^^

1) 先將淡忌廉打成泡狀約2分鐘半


2) 用另一個盆子,將牛奶加入糖及抹茶粉打勻,
可以先試味,看看甜度是否適中




3) 將已起泡的淡忌廉倒入牛奶抹茶混合物打勻,約打3-5分鐘


這隻綠色多美,像中式的湯羹




4) 完成後,放入冰格雪一個鐘

5) 一個鐘後,混合物的表面有少許凝結,再打勻5分鐘,然後放入冰格再雪(記得先用保鮮紙蓋好才放入冰格啊~),
如是者,重覆做三次,每隔一小時打一次


6) 打了第三次之後就將混合物例入雪糕盒內,就可以放入冰格雪至少5-6個鐘,雪硬後就變成美味的雪糕喇

$12店買的即食紅豆,超方便使用



又是試一試雪糕硬度的時間,今次雪足一晚,合格!


未食已經有一股抹茶香味!

把紅豆放上面,就是宇治金時喇!

超好食!! 這味道,讓我記起京都的街道!一切都是回憶。


11 comments:

  1. 口水流到腳趾尾了
    [版主回覆05/16/2013 00:29:51]哈哈,thx呀~!好認同~~非常好味! 得閒試下整!

    ReplyDelete
  2. 好正
    [版主回覆07/08/2013 00:34:09]多謝妳呀!~~抹茶又真係好好味!

    ReplyDelete
  3. 謝謝你的分享...好想整呀
    [版主回覆07/08/2013 21:41:55]不用客氣喇~~齊來整雪糕!!

    ReplyDelete
  4. 你好...睇完你D雪糕MENU, 即係好想整丫.....其實仲想問一下....D雪糕整完放雪箱可以放幾耐呢? 同埋只係用打旦機就可以整?
    多謝你無私的分享......
    [版主回覆07/10/2013 14:18:13]你好啊~~
    5日內食完就最好,我試過最多放7日都仲ok (其實有時一晚都清得晒,哈哈!)
    無錯,用電動打蛋器就可以了~!

    不用客氣喇~~~1齊齊整最開心

    ReplyDelete
  5. 我想問, 你個食MENU可以唔洗加旦同唔洗加熱D CREAM同奶都得呀?
    重有呀, 如我用雪糕機整, 是否扎材料打好後放入雪糕機攪便可?
    Thanks!
    [版主回覆07/28/2013 08:24:41]我無加蛋呀,因為可以keep耐少少。cream同奶都唔洗加熱。
    可以用雪糕機做,也是放入去就可以,但雪糕機份量我就無研究,所以唔知係咪相同都ok, 有機會試下話我知 ^^

    ReplyDelete
  6. 妳好呀, 我想問點解淨係整綠茶要用保鮮紙, 其它味唔駛呢? 定還是其實整咩味都要架?
    我之前跟妳整咗朱古力味, 雪咗一晚, 但係食嘅時候仍然覺得唔係好實, 好冰咁, 雖然都好好味, 但唔知係邊度出問題呢? but anyway, 好多謝妳 share 個 recipe 呀~
    [版主回覆08/11/2013 01:41:14]哈哈,係呀,因為我習慣放入雪櫃自動加保鮮紙,所以無特別寫上去,
    之前有位網友問過,有加番, 我未改晒tim,謝謝提醒呀,等我加番!

    ReplyDelete
  7. Hello,我都跟你整咗抹茶雪糕,
    但唔知點解食落好冰(尋晚整,今晚食,食之前解凍1hour)
    冇雪糕feel…
    [版主回覆08/16/2013 01:00:53]呢期我岩岩整完又試驗過,打淡忌廉打耐D雪糕質地滑左,打2分半鐘杰杰地身(未完全打起)~你有機會試下丫

    ReplyDelete
  8. Candice, 我琴晚整左啦.....真係好好食....不過唔知我有無出錯, 好快溶丫....點樣可以keep耐d先溶呢? 同埋我打完三次都好稀咁, 唔似人地個d打幾次會杰既感覺, 係唔係我打cream時打唔夠時間呢? Thanks.
    [版主回覆08/16/2013 00:58:23]我呢期試過打淡忌廉打耐D,你試下下次打2分半鐘睇下效果會唔會好D (我用1、2度打),因為不同電動打蛋器速度都有唔同,都會有影響。我做o個個就無咁易溶呀(早幾個月無咁熱),可能呢期天氣太熱囉~

    ReplyDelete
  9. 好.....我又再試下先....想問多一句, 係第1次打CREAM時打耐D, 定係次次都要打耐D? 第2,3次再打已混合的材料時(即雪了一個鐘後), 係唔係只係輕輕打下? 定係要好似第1次咁打? 我之前係好似第一次打CREAM時咁打, 所以打完又溶番晒水咁...... 失禮晒......

    ReplyDelete
  10. 想問下在你的BLOG內常提到的$12店,在那呀, 是否指JUSCO 特惠店?

    ReplyDelete
  11. 打勻時抹茶奶都飛到周圍都係><有避免或者減輕既方法嗎?(雪糕正在冷藏中 好緊張呀!(≧∇≦))

    ReplyDelete